హోళీ శుభాకాంక్షలు...

గణతంత్ర దినోత్సవ శుభాకాంక్షలు...

పండగ సందడి..

  పండుగకి పిండివంటలు యేమి చేద్దామా అని ఆలోచిస్తోంది ఇందుమతి. భర్త చంద్రశేఖరాన్ని సలహా అడిగింది.

తనకా హోదా యిచ్చినందుకు యేనుగెక్కినంత సంబరపడ్డాడు చందూ..

 "లడ్డూ చేసెయ్.. " అన్నాడు తీయదనం నెమరేసుకుంటూ..

"పంచదార రేటెంత పెరిగిందో తెలుసా..?" గుర్తు చేసింది ఇందు.

నాలుక్కరుచుకున్నాడతను. బెల్లంతో చెసేవేముంటాయబ్బా... అని దీర్ఘంగా ఆలోచించి,

"పోనీ బూరెలు చెయ్యి.. " అన్నాడు.

"నూనె ధర తెలిసే అంటున్నావా..?" మరో బాంబు పేల్చింది ఇందూ..

ఒక అయిదు నిమిషాలు టైము తీసుకుని, తన బుర్రని మథించి..

"హా.. చక్కెరపొంగలి చెయ్యి.." అన్నాడు తన ఆలోచనకి మురిసిపోతూ..

"అప్పుడే గేస్ సిలిండర్ తెచ్చి నెల దాటింది. ఇప్పుడు కూరా, పచ్చడులు తప్ప పిండివంటలు మొదలుపెడితే ఇట్టే అయిపోతుంది. మళ్ళీ మనం సబ్సిడీ లేకుండా కొనుక్కోవాలి. మీ ఇష్టం.. చెయ్యమంటే చేస్తాను.."

యెంతో ఒద్దికగా చెప్పింది.

వెయ్యిరూపాయలు గాల్లో యెగిరిపోతున్నట్టు కనిపించాయి చందూ కళ్ళకి..

యింక ఇందూ ముందు ఓటమిని అంగీకరించి..

"నీ ఇష్టం.. నీకేది బాగుంటుందంటే అదే చెయ్యి.." అన్నాడు.

 వెంటనే ఇందూ ఒక సంచీ తెచ్చి చందు చేతికిచ్చి, "స్వీట్ షాప్ కి వెళ్ళి ఓ పావుకిలో కాజాలు తెండి.."

అని చందూని షాప్ కి పంపి, టివీలో సీరియల్ చూడ్డం మొదలెట్టింది.

 --------------------------------------------------------------------------------------------------

శుభాకాంక్షలు...

సంక్రాంతి శుభాకాంక్షలు

నాన్నమ్మ చేసే అరిసెలు
అమ్మమ్మ చేసే పూతరేకులు
అత్తయ్య చుట్టే చక్కిలాలు
తాతయ్య తెచ్చే కొత్తబట్టలు

ఎంత బాగుండేది సంక్రాంతి పడుగ...?
ఇప్పుడా ఊరికెడితే ఏదీ ఆ సందడి..?
సగం ఊరు పట్టణం వైపు నడిచిపోయింది
మరో సగం అలా పోలేక అక్కడ ఉండలేక నలిగిపోతోంది

పోనీ పట్టణాల్లో సంక్రాంతి సొబగు చూద్దామా... అంటే

స్వగృహ స్వీట్స్ తో నోరు తీపి చేసుకుంటూ
గుడికెడదామన్నా ఎప్పుడెక్కడ బంద్ లు పెడతారో నని భయపడుతూ
చిన్నప్పటి పండుగ విశేషాలు పిల్లలకి ఊరించి చెపుతూ
రంగోలీ, పతంగుల పోటీలు టీవీలో మాత్రమే చూపిస్తూ
ఎప్పటిలాగే మామూలుగా జరుగుతున్నరోజుకి లేని ఉత్సాహం తెచ్చిపెట్టి
జరుపుకుంటున్నామా మనం ఈ పండగని.. ?
వద్దు... అలా వద్దు..
మనలోని భేషజాలను తీసి అవతల పడేసి మన పిల్లల కోసం
రేపు వారికి తెలియాల్సిన పండుగ ప్రాభవం కోసం అందరం కలిసి
ఉత్సాహం తెచ్చుకుందాం..ఊరంతా సందడి చేద్దాం..
అపార్ట్ మెంటయితేనేం... అక్కడే ఒక ముగ్గు గీత గీద్దాం
కొలువుకి చోటు లేకపోతేనేం..గూట్లోనే బొమ్మలనుంచి హారతిద్దాం
పేరంటానికి చోటు లేకపోతేనేం...పక్క వరండా లోనే చాపలు పరుద్దాం
వాయనం ఇవ్వలేకపోతేనేం...చిటికెడు పసుపు, గోరంత కుంకుమా ఇచ్చి సంతోషిద్దాం..
అందరం కలిసి ఈ పండుగని ఆనందంగా జరుపుకుందాం...
అందరికీ సంక్రాంతి శుభాకాంక్షలు

##################################################################

నీ పదధూళిని కానా ప్రభూ..

సర్వాంతర్యామి అయిన ఓ జగన్నాధా..
ఈ సృష్టిలో నీవు లేని చోటు కలదా ప్రభూ...



పెరిగే ప్రతి మొక్కలో ఒరిగే ప్రతి కొమ్మలో
వూగేటి రెమ్మలో తొడిగేటి మొగ్గలో
విరిసిన ప్రతి పూవులో అలదిన ఆ తావిలో
నీవే కద నా కన్నుల వెన్నెలవై నిలిచేది
నీవే కద నా మనసును పరవశింపచేసేది…



జిలిబిలి ఆ జాబిల్లి జలతారు చారలో
ఒదిగొదిగే పూమొగ్గల మొగమాటపు ముడిలో
వర్షపు తుంపర జారిన ఆకుల తడి మడతలో
ఎటుచూసిన అటు నీవే అనిపించే మనసులో...



చిగురాకుల మోగేటి చిరుగాలుల పిలుపులో
తీయని తేనెలు ధారగ ఒలికేటి పూలలో
జారిన చినుకుల మ్రోగిన చిరు మువ్వల సడిలో
అదిగదిగో అదె నీ అడుగుల సడి కాదా..



తరియించెద నీ పూజకు పూదండను నేనై
తరియించెద నీ యెడదను చందనపు పూతనై
తరియించెద నీ చూపుల నిండుగ నే కరుణనై
తరియించెద తరియించెద నీ పదముల ధూళినై...




సర్వాంతర్యామి అయిన ఓ జగన్నాధా..
ఈ సృష్టిలో నీవు లేని చోటు కలదా ప్రభూ...

సంక్రాంతి శుభాకాంక్షలుగా ఒక సంక్రాంతి పాట.

పల్లవి--దివ్యకాంతి సంక్రాంతి వనమంతా వింతకాంతి
పసిడికాంతుల ధాన్యరాశుల సుధలు చిందు నగవులరాశి..//

చరణం---ముద్దులొలుకు ముద్దబంతులు చిరునవ్వుల చేమంతులు
పుడమి ఒడిని పసిడినిచేయ హేమంత ఋతువును చేరె...//

చరణం--లోగిళ్ళమెరయు రంగవల్లులు ముంగిళ్ళ ముందు గొబ్బిళ్ళశొభ
చాటుకదా మన సంస్కృతినీ తరతరాల మన చరిత్రనీ...//

samkramti2.mp3

పండుగ బహుమతి

--

సంక్రాంతి పండగంటేనే పెద్దపండుగ అంటుంటాం.. సుమారు పదేళ్ళ క్రితం ఇలాంటి సంక్రాంతి పండుగకే మా స్నేహితులందరం కలిసి ఆకాశవాణి లో ఒక చిన్న నాటిక వేసాం. అది గుర్తొచ్చి ఇక్కడ పెడుతున్నాను. దీనికి కొన్ని పరిమితులున్నాయి. అన్నీ స్త్రీపాత్రలే ఉండాలి లాంటివి. అందరం అనుభవం లేని వాళ్ళమే. సరదాగా చేసిన ఈ నాటకం మళ్ళీ పండక్కి ఒకసారి గుర్తుచేసుకుంటూ మీ అందరికీ వినిపిస్తున్నాను. ఇది చదవాలంటే ఇక్కడ చదవండి. వినాలంటే ఈ లింక్ కి వెళ్ళి వినండి. ఇక్కడే వినాలంటే పైన బటన్ క్లిక్ చెయ్యండి..
http://www.divshare.com/download/9971636-534



పండుగలన్నింటిలోకీ పెద్ద పండుగ అయిన సంక్రాంతి పండుగకు కొత్త అల్లుడు అత్తవారింటికి రావడం, బహుమతులు అందుకోవడం మనం చూస్తున్నదే. ఈ సంక్రాంతి సందర్భంగా చిన్న నాటిక. "పండుగ బహుమతి." రచన, నిర్వహణ శ్రీమతి.జి.ఎస్.లక్ష్మి. పాల్గొన్నవారు- అమ్మమ్మ పార్వతమ్మగా-శ్రీమతి జయలక్ష్మీ కృష్ణమోహన్, అమ్మ వసుంధరగా-శ్రీమతి మణి,
పెద్దకూతురు సునందగా -శ్రీమతి దుర్గ, రెండవ కూతురు వైదేహిగా-శ్రీమతి శుభ, పక్కింటావిడ మాలతిగా-శ్రీమతి దుర్గాశేఖర్..
వసుంధరగారి పెద్దమ్మాయి సునంద కి కొత్తగా పెళ్ళైంది. వెంటనే వచ్చిన సంక్రాంతి పండగకి అమ్మగారింటికి వచ్చింది. ఆమె అమ్మ, అమ్మమ్మ, చెల్లెలు వైదేహి సునందను ప్రశ్నలతో ఉక్కిరిబిక్కిరి చేస్తున్నారు. ఈ లోపల పక్కింటావిడ మాలతి కూడా వాళ్ళింటికి వెళ్ళింది. మనమూ వెళ్ళి చూద్దాం రండి సంగతేవిటో.....
మాలతి--వసుంధరగారూ, ఇల్లంతా చాలా సందడిగా ఉంది. సునంద వచ్చిందా యేంటి?
వసుంధర--రండి వదినగారూ, ఇవాళ పొద్దున్నే వచ్చింది.
మాలతి--అల్లుడు కూడా వచ్చాడా?
వసుంధర-- ఇంకా లేదు. వస్తాడు. ముందు అమ్మాయిని పంపించాడు.
పార్వతమ్మ--ఏమ్మా..మాలతీ, కులాసానా..
మాలతి-- మీరా పిన్నిగారూ, ఎప్పుడొచ్చారు? బాబయ్యగారు కులాసానా..
పార్వతమ్మ--ఆ..బానే ఉన్నారమ్మా. సంక్రాంతి పండగకి కొత్తల్లుడు వస్తున్నాడని అమ్మాయి ఉత్తరం రాసింది, కాస్త సాయంగా ఉంటానని బాబయ్యగారు నన్ను పంపారు.
వసుంధర--మంచిపని చేసారు. అసలే పెద్ద పండుగ. అల్లుడేమో కొత్తల్లుడాయే. పెద్దవారు మీరు దగ్గరుండి మంచీ చెడ్డా చూసుకోకపోతే వసుంధరగారికి ఇబ్బందే కదా.
సునంద-- హాయ్ ఆంటీ, బాగున్నారా..
వసుంధర--అహా.. మా మాటకేం కాని నీ సంగతి చెప్పు. కొత్త పెళ్ళికూతురువికూడాను. కొత్తగా అత్తవారింటినుంచి వచ్చావ్. విశేషాలేంటో చెప్పు మరి..
సునంద--విశేషాలేమున్నాయాంటీ. అంతా మామూలే.
వసుంధర--ముందు మీ ఆయన సంగతి చెప్పు. సంక్రాంతికి యేం బహుమతి కావాలిట మీ ఆయనకి?
వైదేహి-- ఒక జెట్ ఎయిరోప్లేన్ కావాలిటాంటీ..కొనిస్తారా?
వసుంధర-- ఈ వైదేహి కన్నింటికీ వేళాకోళమే.
సునంద-- అయినా బహుమతులేంటాంటీ సిల్లీగా..
పార్వతమ్మ--అదేంటే.. సిల్లీ. పిల్లీను. పండక్కి బహుమతులివ్వడం మామూలేకదా..అందులో కొత్తల్లుడూ, పెద్ద పండగానూ. అవునూ, సునందా, మీ ఆయన యేం కావాలన్నాడే. నాతో చెప్పు. నేను మీ అమ్మతో చెప్తాలే..
వైదేహి-- నే న్చెప్పనా అమ్మమ్మా..
సునంద-- నువ్వుండవే..ఈ రోజుల్లో ఇవన్నీ యేంటి అమ్మమ్మా..
పార్వతమ్మ-- అదేంటే , మరీ చోద్యం..రోజుల్తో పాటు కానుకలు మారతాయి కాని కానుకలు ఇవ్వడం మానేయరెవరూను.
వైదేహి-- ఎందుకివ్వాలి? ఈ మధ్యనే కదా నాన్న అంత ఖర్చు పెట్టి పెళ్ళి చేసేరు. మళ్ళీ పండుగలూ, బహుమతులూ అంటూ పూర్తిగా అప్పుల్లో మునిగిపోతే కాని ...
పార్వతమ్మ-- అదెంటె.. పండగకి కొత్తల్లుడికి బహుమతి ఇవ్వడానికి కష్టమేవిటే పిచ్చిదానా. ఇది మన సాంప్రదాయం. మీ నాన్న మా దగ్గర పుచ్చుకోలేదూ? తనూ అల్లాగే ఇస్తాడు అల్లుడికి.
వైదేహి-- దీనినే తనతో పాటు ఎదుటివాడిని కూడా గోతిలోకి లాగడం అంటారు.
మాలతి-- మీ అల్లుడికి ఆ రోజుల్లో మీరేవిచ్చారు పిన్నిగారూ?
పార్వతమ్మ-- ఏమోనమ్మా..సరిగా గుర్తులేదు. నాకూ నలుగురాడపిల్లలా.. అలాగని ఊరుకున్నామా..దేని ముచ్చట దానిదే.
ఒకాయనకి ఉంగరమిస్తే మరొకాయనకి వాచీ, ఇంకొ కాయనకి రేడియో..ఇలా ఇచ్చాం. అంతేకాని పండగ బహుమతులు మానుకుంటారా యెవరైనా?
మాలతి-- అది నిజమేనండి పిన్నిగారూ. కానుకలు స్వరూపాలు మారేయి కాని కానుకలు ఇవ్వడం మానలేదు ఎవరూ. మొన్న మా అన్నయ్యగారబ్బాయికి వాళ్ళ మావగారు కలర్ టీ. వీ. ఇచ్చారు.
వసుంధర-- యేదో ఒకటి. టీ.వీ కాని, వీడియో కాని, స్కూటర్ కాని ఎవరికి తగ్గది వాళ్ళు ఇస్తూనే ఉన్నారు. కట్నాలు లేవన్న మాటే కాని యే ఖర్చు తగ్గిందనీ..
పార్వతమ్మ-- అదీ నిజమే.. మొన్నీమధ్య మా మేనకోడలు పెళ్ళి చెస్తే వెళ్ళేను. పెళ్ళికొడుకు అమెరికా నుంచొచ్చేట్ట. యెంత గొప్పగా చెప్పుకున్నారో అతని గురించి. కాని పెద్ద పేచీ పెట్టేసేడనుకో పెళ్ళిలో..
మాలతి, వసుంధర-- అదేవిటీ? యెందుకూ?
పార్వతమ్మ--పెళ్ళిలో ఊరేగింపుకి పల్లకీయే కావాలని కూర్చున్నాడు.
మాలతి--పల్లకీయా? యెందుకూ?
పార్వతమ్మ-- పల్లకీ యెక్కి ఊరేగాలిట. అది వీడియో తీసుకుని అమెరికాలో చూపిస్తాడుట.
వసుంధర-- యేవిటీ? నిజంగానే?
పార్వతమ్మ-- ఆ. ఇంక మా మేనకోడలు మొగుడి ఖంగారు చూడు. హైదరాబాదులో పల్లకీ ఎక్కడ దొరుకుతుంది చెప్పు?
అందరూ--హహ్హహ
వైదేహి-- ఫారిన్ లో మన గురించి యేదో చెప్పుకోవాలని కాకపోతే యెందుకిదంతా చెప్పు అమ్మమ్మా.. వాళ్ళ వేషభాషలు, టెక్నాలజీ అంతా అనుకరిస్తాం. కాని వాళ్ళెమో భార్యా భర్తలు కావాలనుకున్నవాళ్ళు మరొకరిని అడక్కుండా స్వయంకృషితో
ఇంటికి కావలసిన వస్తువులన్నీ కొనుక్కుంటారు. మరి మనమో..మీ అమ్మేవిచ్చిందీ.. మీ నాన్నేవిచ్చాడూ అని పెళ్ళైన మర్నాటినుంచీ గొడవే..
మాలతి-- పిన్నిగారూ, ఈ అమెరికా వాళ్ళతో ఇదే గొడవండీ బాబూ.. మొన్నీమధ్య మావారి ఫ్రెండింట్లో పెళ్ళి కెళ్ళానని చెప్పానా? పెళ్ళికొడుకు అక్కగారు అమెరికా నుంచి వచ్చిందిట. ఆవిడకి తిరగట్లో విసిరిన కందిపొడే కావాలని కూర్చుంది. మిక్సీ లో చేసిన కందిపొడికి ఆ రుచి రానే రాదుట. ఇంక ఆ పెళ్ళివారి పాట్లు భగవంతుడికే తెలుసు.
పార్వతమ్మ-- ఏవోనమ్మా, రోజులు మారేయంటున్నారు. మనుషులు మారేరంటున్నారు. కానీ ఈ పధ్ధతులు మటుకు పేర్లు మారాయి తప్పితే ఇచ్చిపుచ్చుకోడాలు మటుకు యేమీ మారలేదు.
మాలతి-- ఇదివరకే నయం పిన్నిగారూ, యేదిస్తే అది తీసుకునేవారు. ఇప్పుడు వాళ్ళ కేంకావాలో అడిగి మరీ తీసుకుంటున్నారు. ఈ మధ్య మా అక్క అల్లుడు పండక్కియేం కావాలో పెళ్ళానికి చెప్పి మరీ పంపించేడు.
పార్వతమ్మ-- యేం కావాలన్నాడూ?
మాలతి-- ఆ.యేముందీ... ఈ రోజుల్లో హై లైట్ లొ ఉన్నదే.. మంచి కంపెనీ లో షేర్లు కొనిమ్మన్నాడుట.
వైదేహి-- గోవిందా. గోఓవింద.. చాలా షేర్స్ రేట్లు పడిపొయాయాంటీ.
మాలతి-- సునందా, నువ్వు మీ ఆయనకి యేం కావాలో రాసి కనుక్కో. అతనడిగింది మీ నాన్నగారు మటుకు కాదంటారేంటి?
వసుంధర-- అవును మరి. అయ్యే ఖర్చు ఎల్లాగూ అవుతుంది.. ఆ ఇచ్చేదేదో అతనడిగింది ఇస్తేనే సరి.
వైదేహి-- అక్కా, ఓ పని చైవే..మనం ఈ సారి పధ్ధతి మారిస్తే..
సునంద-- అంటే?
వైదెహి--మనవే పండక్కి బావగారింటికి వెళ్ళిపోతేనో..రోజులు మారేయి కదా.
పార్వతమ్మ-- చాల్లే ఊరుకొ..ఎవరైనా వింటే నవ్విపోతారు.
మాలతి-- పిన్నిగారూ, ఇంతకీ పండగ స్పెషల్స్ యేం చేస్తున్నారు మీ మనవడికి?
పార్వతమ్మ--పెద్ద పండగాయె. బొబ్బట్లు లేపోతే యెలా?
సునంద--అమ్మో బొబ్బట్లా? అవాయన తినరే అమ్మమ్మా.
పార్వతమ్మ-- బొబ్బట్లు తినకపోవడమేమిటే చోద్యం? అసలు అలాంటి పిండివంట ఉందా అని?
సునంద-- బొబ్బట్లు ఆయనకి అరగవే అమ్మమ్మా..ఆయన బ్రేక్ ఫాస్ట్ కూడా కార్న్ ఫ్లేక్స్, బ్రెడ్, బటర్ తప్పితే తినరు.
పార్వతమ్మ-- అదేవిటే రోగిష్టి వాళ్ళ లాగ ఆ బ్రెడ్ ముక్కలూ. మీ తాతగారు పనికట్టుకుని నన్ను పంపిందే అందుకు.. చక్కగా బొబ్బట్లు చేసి, ఇంత నెయ్యి వేసి మీ ఆయనకి వడ్డించమని..
వైదేహి-- ఈ రోజుల్లో అంతంత నేతు లెవరూ తింటం లేదు అమ్మమ్మా. ధరల మాటటుంచి ముందంతంత నెయ్యి తింటే కొలెస్టరాల్ పెరుగుతుందని డాక్టర్లు చెప్తున్నారు.
పార్వతమ్మ--ఇప్పటికీ మీ తాతగారికి ముద్దపప్పూ, పేరిన నెయ్యీ లేకపోతే ముద్ద యెత్తరు.. ఆయనకేవీ? గుండులా లేరూ..
వైదేహి-- తాతయ్యంటే మరి నీ హీరో కదా .. నీకలాగే అనిపిస్తార్లే..
పార్వతమ్మ-- చాల్లే ఊరుకో.. అవునే అమ్మాయ్, మన రవిని రమ్మని రాసావా లేదా?
వసుంధర-- రవెందుకమ్మా?
పార్వతమ్మ--అదేవిటే.. బావగారు పండక్కి వస్తుంటే బావమరిది లేకపోతే ఎలా? పేకాడాలన్నా, ఫ్రెండ్సిళ్ళకీ, సినిమాలకీ వెళ్ళాలన్నా బావమరిది లేకపోతే ఎలా?
వైదేహి-- ఆ రోజులు పోయాయ్ అమ్మమ్మా. ఇప్పుడు బావమరిదితో పనిలేదు. అన్నీ భార్యే.. కదే అక్కా..
పార్వతమ్మ-- ఏవోనమ్మా.. సునందా, మరీ మీ అత్తగారూ, మామగారూ ఎప్పుడొస్తారూ?
సునంద-- వాళ్ళెందుకు?
మాలతి-- అయ్యో, అదంతా అదివరకు రోజుల్లో పిన్నిగారూ. ఒక పెళ్ళి జరిగిందంటే ఆ కుటుంబమూ, ఈ కుటుంబమూ కలిసిపోయేవి. మంచికీ, చెడ్డకీ ఒకరికొకరుగా ఉండేవారు. మరి ఈ రోజుల్లోనో.. మొగుడూ పెళ్ళాలకి మరొకరి పొడే కిట్టదు.
ఎంతసేపూ వాళ్ళిద్దరే.
పార్వతమ్మా-- ఏంటో.. ఏం మారినా ఈ ఇచ్చిపుచ్చుకోడాలు పోలేదు కదా. అమ్మాయీ, ఈ రోజుల్ని బట్టి సునంద మొగుడికి కలర్ టీవీ కొనివ్వండే.. చెప్పుకుందుకూ దర్జాగా ఉంటుంది.
మాలతి-- కలర్ టీవీ ఈపాటికి కొనేసుకునే ఉంటారండీ వదినగారూ. నా మాట విని విసిఆర్ కొనిస్తే బాగుంటుందేమో ఆలోచించండి.
వసుంధర--పోనీ ఓ పని చేస్తే..స్కూటర్ కొంటే ఎలా ఉంటుందంటారు? చక్కగా సాయంత్రం అయ్యేసరికి ఇద్దరూ సినిమాల కెళ్ళడానికి బాగుంటుంది.
వైదేహి-- చాలా.. ఇంకా ఏమైనా ఉన్నాయా? ఉట్టినే ఇస్తే పుచ్చుకునేందుకేం? అన్నీ కొనివ్వండి.
సునంద-- అబ్బబ్బబ్బ.. ఉండండే..ఏదో లెటర్ వచ్చింది చూణ్ణివ్వండి..
పార్వతమ్మ-- ఎవరే ఉత్తరం? మీ ఆయనేనా? ఏం కావాలన్నాడూ? టీవీనే కదూ?
మాలతి-- కాదు. వీడియో అయ్యుంటుంది. కదూ సునందా?
వసుంధర-- అతని కామాత్రం తెలీదేంటీ.. స్కూటర్ కే ఓటు వేసుంటాడు.
వైదేహి-- ఎంతైనా బావగారు గ్రేట్. పండక్కి మనందర్నీ అక్కడికే రమ్మనుంటారు. నాకు తెలుసు. కదే అక్కా..
సునంద-- అయ్యాయా మీ ఊహాగానాలు. ఆయన నన్ను వెంటనే బయల్దేరి రమ్మన్నారు.
అందరూ-- అదేంటి?
పార్వతమ్మ-- పండక్కి మీ ఆయనిక్కడికి రాడూ?
సునంద-- అనుకోకుండా ఆయనకి వారం రోజులు సెలవు దొరికిందిట. అందుకని సౌత్ టూర్ వెడదామని రమ్మన్నారు. రిజర్వేషన్స్ అన్నీ అయిపోయాయిట. సెలవులు, పండగలు అన్నీ అక్కడే గడిపేసి అలా వెళ్ళి ద్యూటీ లో జాయిన్ అయిపోడమే. అమ్మా, నా సూట్ కేస్ ఏదీ?
అంతే కాదు. బోనస్ వచ్చిందట. పెద్దవాళ్ళు కదా, అమ్మకీ, నాన్నకీ బట్టలు కొనమని వెయ్యిరూపాయలు డ్రాఫ్ట్ పంపించారు.
అందరూ-- నిజవే...
సునంద-- ఆ... నిజవే..
వైదేహి-- ఇదిగో.. నే చెప్పలా? బావగారూ ఈజ్ గ్రేట్.







౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮౮

స్వీటూ---హాటూ

వనభోజనాల సమయానికి నాకు రావడం కుదరలేదు. మన్నించాలి. అంతా సద్దుమణిగాక ఇప్పుడు వంటల గొడవలెందుకు అనుకోకండి. మనకి మూడుపూటలూ అన్ని రకాల రుచులూ కావాలి కదా. అందుకే నా పాక శాస్త్ర నైపుణ్యం కూడా మీకు చూపిద్దామని ఈ ధైర్యం చేస్తున్నాను. ఆ సందర్భంలో కాస్త దవడ ఆడింపుకి అంటే స్వీట్ హోమ్ లో విమల అన్నట్లు ఇంట్లో తింటే వీధిలోకి వినపడే స్వీటు, హాటు ఎలా చెయ్యాలో మీకు చెప్పదల్చుకున్నాను. అలాగని ఇవేమీ అషా మాషీ వనుకోకండి. ఈ స్వీటు, హాటు రెండూ కూడా బాంబినో కంపెనీ వారు నిర్వహించిన వంటల పోటీలలో నాకు ప్రథమ బహుమతులను తెచ్చిపెట్టాయి. హహహహ్.. ఇక మొదలెట్టండి మరి..

బాంబినో గవ్వలు


కావల్సిన పదార్ధాలు:
బాంబినో సేమ్యా పేకట్- - ఒకటి
పంచదార-------------పావు కిలో
గోధుమ పిండి-----వంద గ్రాములు
ఏలకుపొడి-------ఒక టీ స్పూను
నూనె----వేయించడానికి సరిపడినంత

చేసే విధానం—
ముందుగా సేమ్యాని మిక్సీలో వేసి రవ్వలాగ పొడి చేసుకోవాలి. అందులో గోధుమపిండి వేసి నీళ్ళు పోసి చపాతీల పిండిలా కలుపుకోవాలి. ఆ పిండి చిన్న చిన్న ఉండలుగా చేసుకుని, గవ్వలపీట సహాయంతో గవ్వలుగా తయారుచేసుకోవాలి. ఈ మధ్య కొంతమంది ఇళ్ళల్లో ఈ గవ్వల పీటలు ఉండడంలేదు. ఖంగారు పడకండి. దానికో ఉపాయం ఉంది. ఫోర్క్ ఉంటుంది కదా.. దాని సహాయంతో కూడా గవ్వలు చేసుకోవచ్చు. అలాగ తయారుచేసుకున్న గవ్వలని నూనెలో దోరగా వేయించుకోవాలి.
పంచదార లో తడిసేదాకా నీళ్ళు పోసుకుని బాగా ముదరపాకం పట్టుకోవాలి. అందులో ఏలకుపొడి వేసుకున్నాక ఈ వేయించి పెట్టుకున్న గవ్వలను
అందులో వేసి, స్టౌ మీంచి దించేసి బాగా కిందా మీదా కలిపేసుకోవాలి. అప్పుడు పంచదారంతా గవ్వల చుట్టూ పట్టుకుంటుంది. ఇంకేముంది..తినెయ్యడమే..(ఆగండాగండి.. కాస్త చల్లారనివ్వండి మరి)
ఈ లోగా మనం హాటు చేసేసుకుందాం....


మాకరోని మిక్చర్


కావలసిన పదార్ధాలు----
మాకరోని పేకట్--ఒకటి
పల్లీలు(వేరుసెనగపప్పులు)--వంద గ్రాములు
పొట్నాల పప్పు(గుల్ల సెనగపప్పు)--వంద గ్రాములు
చిన్న చిన్న బేకరీ బిస్కట్లు(జీడిపప్పు ఆకారంలో ఉంటాయి)(కావాలంటే వేసుకోవచ్చు)
కరివేపాకు--రెండు కట్టలు
ఉప్పు---తగినంత
ఎండు మిరపకాయల కారం పొడి ---తినగలిగినంత
జీలకర్రపొడి---ఒక టీ స్పూన్
నూనె--వేయించడానికి సరిపోయేంత.
చేసే విధానం--
మాకరోనీ, పల్లీలు, కరివేపాకు ఆకుదూసి, అన్నీ విడివిడిగా వేయించుకోవాలి.
ఒక బౌల్ లో వేయించుకున్న వాటితోపాటు పొట్నాలపప్పు, ఉప్పు, కారం, జీలకర్రపొడి అన్నీ బాగా కలుపుకోవాలి. అంతే..ఎంతో రుచికరమైన బాంబినో మిక్చర్ రెడీ..

ఇక కానివ్వండి మరి....


##################################################

కృష్ణాష్టమి శుభాకాంక్షలు

జగత్తుకే ముద్దుబిడ్డ శ్రీకృష్ణుడు. ప్రతి తల్లీ తన కొడుకే కృష్ణుడన్న భావనలో మురిసిపోయి జోలపాటలు పాడుతుంది. ఇది అలాగ వ్రాసుకున్న పాటే..ఈ కృష్ణాష్టమి సందర్భంగా.

పల్లవి-- సిరిసిరి నవ్వుల చిన్ని కిశోరా
నవనీతచోరా నిద్దురపోరా //

చరణం--మా ఇంటి కృష్ణుడు తెల్లనమ్మా
మూసిన కన్నుల వెన్నెలమ్మా
దోబూచులతో దొంగాటలతో
అలసిన కృష్ణమ్మా జోలమ్మా--జొ లాలమ్మా//సిరినవ్వుల//

చరణం- నా గానమె తల్లి యశోద లాలిగా
నాదీవనె నీకు శ్రీరామ రక్షగా
నిదురించు ఒడిలోన వటపత్రశాయిలా
కోటి దీవెన లెన్నొ పాడతా జోలగా//సిరి సిరి//

#########################

వరలక్ష్మీదేవికి నివేదన

ఎప్పటినుంచో మేము ఈ వరలక్ష్మి శుక్రవారానికి లక్ష్మీదేవికి నైవేద్యం పెట్టి ఒక పాట పాడుకుంటుంటాం. ఆ పాట ఏదో పాత భక్తి సినిమాలోది. ఏ సినిమా లోదో గుర్తులేదు. పాటకూడా మధ్యలో కొన్ని మాటలు గుర్తు లేవు. అయినా పాట పాడడం రాకపోయినా మాట చెప్పినట్లే దానిని చెప్పుకునే సంప్రదాయంలో పడిపొయాము. ఈ పండుగకి అందరూ కూడా అమ్మవారి దగ్గర అది పాడుకుంటే బాగుంటుందని అనిపించి రాస్తున్నాను. ఇది ఏ సినిమా లోదో ఎవరికైనా తెలిసినా, దానిని అప్ లోడ్ చేసి అందరికి అందించినా నాకన్న సంతోషపడేవారు మరొకరుండరు. వారికి ముందుగానే ధన్యవాదములు తెలుపుకుంటున్నాను.

పల్లవి-- వరమహాలక్ష్మీ కరుణించవమ్మా చరణాల శరణంటినమ్మా వరమహాలక్ష్మీ కరుణించవమ్మా
నా వేదనను బాప నీ దేవుతో కూడి నైవేద్యమందుకోవమ్మా//వరమహాలక్ష్మీ కరుణించవమ్మా//

చరణం-- పాలకడలిని పుట్టి శ్రీహరిని చేపట్టి వైకుంఠలోకాన లక్ష్మివైనావే మాంపాహి మాతా మాంపాహి మాతా
సత్వగుణమూర్తివే సంపత్ స్వరూపివే ఇల సకల సంపదలదాయినీవమ్మా
నా వేదనను బాప నీ దేవుతో కూడి నైవేద్యమందుకోవమ్మా//వరమహాలక్ష్మీ కరుణించవమ్మా//

చరణం-- వాగీశురాణివై వరవీణపాణివై సత్యలోకమ్మున వాణివైనావే మాంపాహి మాతా మాంపాహి మాతా
సత్వగుణమూర్తివే సంపత్ స్వరూపివే ఇల సకల విద్యలకు తల్లి నీవమ్మా
నా వేదనను బాప నీ దేవుతో కూడి నైవేద్యమందుకోవమ్మా//వరమహాలక్ష్మీ కరుణించవమ్మా//

చరణం-- గిరిరాజ తనయవై పరమేశు తరుణివై కైలాసలోకాన గౌరి వైనావే మాంపాహి మాతా మాంపాహి మాతా
సత్వగుణమూర్తివే సంపత్ స్వరూపివే ఇల సకల సౌభాగ్య దాయినీవమ్మా
నా వేదనను బాప నీ దేవుతో కూడి నైవేద్యమందుకోవమ్మా//వరమహాలక్ష్మీ కరుణించవమ్మా//

వరలక్ష్మీదేవికి నైవేద్యం

ప్రమదలందరికీ పండుగ పిండివంటల సన్నాహాలకి స్వాగతం. అసలేనైవేద్యాలు తయారుచేసుకొవాలి. పూజకి అన్నీ సిధ్ధం చేసుకోవాలి. భక్తిగా పూజచేసుకోవాలి. అందుకని సులభంగా 9 రకాలు చెసుకునె విధానం. ప్రమదలందరూ చదివితరించుదురుగాక.

1. పులగం. (ఇది అమ్మవారికి చాలా ప్రీతి). చేసుకోవడం అందరికి తెలుసనేఅనుకుంటున్నాను. నాలుగు పప్పుబద్దలు, బియ్యం, చిటికెడు పసుపు కలిపిచిన్నగిన్నెలో కుక్కర్ లొ పెట్టెయ్యడమే.

2. పరవాన్నం.(ఇది కూడా అమ్మవారికి ఇష్టమైనదే). బియ్యంతో కాని, సేమ్యాతోకాని చేసుకోవచ్చు.

3.పులిహార. (ఇది అమ్మవారికే కాదు, చాలామందికీ ఇష్టమైనదే) . వివిధరకాలుగాచేసుకోవడం తెలుసుకదా.

4. దధ్ధోజనం.(గుళ్ళో కూడా ఈ ప్రసాదం పెడుతుంటారు). వండిన అన్నంలోపెరుగు, ఉప్పు, పచ్చిమిరపకాయలు, కరివేపాకు, కొత్తిమిర కలుపుకుని, కాస్తఇంగువ, ఆవాలు, 2 మెంతిగింజలు, 2ఎండు మిరపకాయముక్కలు వేసి నేతిపోపుపెట్టుకోవడమే.

5. కేసరి. (అదే సత్యనారాయణస్వామివారి ప్రసాదం). 1కప్-బొంబాయిరవ్వ, 1కప్-పంచదార, 2 టేబుల్ స్పూన్స్ నెయ్యి, కావలసినన్ని జీడిపప్పులు, కిస్ మిస్,సువాసనకు యాలకులపొడి.ముందుగా రవ్వలో పంచదార కలిపేసుకుని రెడీగా పెట్టుకోవాలి.(అలాగయితేప్రసాదం వుండలు కట్టకుండా వుంటుంది). తర్వాత స్టౌవ్ వెలిగించుకునిఅందులొ1టేబుల్ స్పూన్ నెయ్యి వేసుకుని జీడిపప్పులు, కిస్ మిస్ లువేయించుకోవాలి. వేగాక 2కప్పుల నీరు పోసుకుని, మరిగాక కలిపి పెట్టుకున్నరవ్వ, పంచదార వేసి ఒక్క నిమిషం వుడకనివ్వాలి. అప్పుడందులో యేలకుల పొడివేసి, మిగిలిన నెయ్యివేసి కలిపేసుకుంటే కేసరి రెడీ. సగం నైవేద్యానికిఅట్టిపెట్టుకుని మిగిలిన సగంతో సొజ్జప్పాలు చేసుకొవాలి. ఒక్క దెబ్బకిరెండు ప్రసాదాలన్నమాట.

6. సొజ్జప్పాలు. ( పల్చగా చెసుకుంటే కరకరలాడుతూ వుంటాయి). 1కప్ మైదాచపాతిపిండిలా కలుపుకున్నాక, అందులో 1 స్పూన్ ఆయిల్ వేసి కలుపుకోవాలి. అవిచిన్న వుండగా చేసి అరచేతిలొ తట్టుకుంటూ మధ్యలో కేసరి చిన్న వుండగా చేసిపెట్టి చిన్న పూరీలా చేతితోనే వత్తుకోవాలి. అవి ఆయిల్ లో వేయించుకోవాలి.(డీప్ ఫ్రై అన్నమాట).

7.గారెలు. (అమ్మవారికి చాలా ఇష్టమైన నైవేద్యం). ఇది చెయ్యడం అందరికీతెలుసుకదా. అవే మరికొన్ని ఎక్కువగా చెసుకుంటే మరో నైవెద్యం. అదీ
8. ఆవడలు. (లేదా పెరుగు గారెలు). ఇవి చెయ్యడం అందరికీ తెలుసనేఅనుకుంటున్నాను.

9. మైసూరుబజ్జీ.- ఇది చెయ్యడం చాలా సులభం. 1కప్ మైదా, 1/4 కప్బియ్యంపిండి, 1కప్ పెరుగు, 1స్పూన్ పచ్చిమిరపకాయముక్కలు,1/4స్పూన్వంటసోడా, తగినంత ఉప్పు. అన్ని బాగా కలిపి చిన్న చిన్న వుండలుగా నూనెలోవేసి డీప్ ఫ్రై చెయ్యడమే.

చూసారా.. చూస్తూండగా 9రకాల నైవెద్యాలు ఎంత చక్కగా చెప్పుకున్నామో..ఏమైనా సవరణలుంటే నిస్సంకోచంగా చెప్పండి. శ్రీలలిత.