Pages

Tuesday, August 31, 2010

నీ పదధూళిని కానా ప్రభూ..



సర్వాంతర్యామి అయిన ఓ జగన్నాధా..
ఈ సృష్టిలో నీవు లేని చోటు కలదా ప్రభూ...



పెరిగే ప్రతి మొక్కలో ఒరిగే ప్రతి కొమ్మలో
వూగేటి రెమ్మలో తొడిగేటి మొగ్గలో
విరిసిన ప్రతి పూవులో అలదిన ఆ తావిలో
నీవే కద నా కన్నుల వెన్నెలవై నిలిచేది
నీవే కద నా మనసును పరవశింపచేసేది…



జిలిబిలి ఆ జాబిల్లి జలతారు చారలో
ఒదిగొదిగే పూమొగ్గల మొగమాటపు ముడిలో
వర్షపు తుంపర జారిన ఆకుల తడి మడతలో
ఎటుచూసిన అటు నీవే అనిపించే మనసులో...



చిగురాకుల మోగేటి చిరుగాలుల పిలుపులో
తీయని తేనెలు ధారగ ఒలికేటి పూలలో
జారిన చినుకుల మ్రోగిన చిరు మువ్వల సడిలో
అదిగదిగో అదె నీ అడుగుల సడి కాదా..



తరియించెద నీ పూజకు పూదండను నేనై
తరియించెద నీ యెడదను చందనపు పూతనై
తరియించెద నీ చూపుల నిండుగ నే కరుణనై
తరియించెద తరియించెద నీ పదముల ధూళినై...




సర్వాంతర్యామి అయిన ఓ జగన్నాధా..
ఈ సృష్టిలో నీవు లేని చోటు కలదా ప్రభూ...

Saturday, August 7, 2010

ఒద్దు....మాట్లాడొద్దు..



ఒద్దు....మాట్లాడొద్దు..

పెద్దవాళ్ళకు బదులిస్తావా...ఒద్దు మాట్లాడొద్దు
అన్నతమ్ములతో పంతాలా..ఒద్దు మాట్లాడొద్దు
భర్త మాటకు బదులిస్తావా..ఒద్దు మాట్లాడొద్దు
బంధువులతో వాదాలా..ఒద్దు మాట్లాడొద్దు
పిల్లలను బెదిరిస్తావా..ఒద్దు మాట్లాడొద్దు
మనవలను అదిలిస్తావా..ఒద్దు మాట్లాడొద్దు


మరింక ఎప్పుడమ్మా నా నోట మాట రావడం?


అఖ్ఖర్లేదు..అలాగే వుండు..
మంచిదానివనిపించుకో..
ఉత్తమాయిల్లాలి వనిపించుకో..
మంచి తల్లి వనిపించుకో..
ఆడదానివి.. నీకంటూ నీకేమిటుంటుంది?
ఒకరికి కూతురిగా..
ఇంకొకరి ఇల్లాలిగా.
మరొకరికి అమ్మగా..
మనవలకి మామ్మగా.. అంతె..నీ వునికంతే..
నీకు అస్తిత్వం లేదు..
వుందనుకుంటే నీకు కలిగేది బాధే తప్ప ప్రయోజనం లెదు..
నీవొక కరిగే కొవ్వొత్తివి..
అంతటా వెలుగిస్తావు తప్పితే ..నీ చుట్టూ చీకటే..


మరి..నాకింక ..ఇష్టాయిష్టాలుండవా..


వుండవు...వుండకూడదు..
అసలు నువ్వంటూ వుంటే కదా..
నీకంటూ ఇష్టాయిష్టాలుండడానికి..
ఒక కూతురివి, ఒక ఇల్లాలివి,
ఒక అమ్మవి, ఒక మామ్మవి..అంతే..
అందరి పాపాలూ హరించేంత ఘనతగల గౌతమి కూడా..
సముద్రునిలో కలిసి ఉప్పునీరైపోయింది..
అలాగే నువ్వు కూడా..
నీకెంత తెలివున్నా, చదువున్నా, ప్రఙ్ఞాపాటవాలున్నా
ప్రకృతి ధర్మానికి లోబడి..
గౌతమి సముద్రునిలో కలిసినట్టు ..
నువ్వు కూడా నీ భర్త ననుసరించి ఉప్పునీరైపోక తప్పదు..
ఇదింతే..ఇది లోక ధర్మం..
నదులు సముద్రంలోకలిసే చోట తీర్థమాడితే యెంత పుణ్యం..


-------------------------------------------------------------------------

Sunday, August 1, 2010

HAPPY FRIENDSHIP DAY

స్నేహానికి నిర్వచనం స్నేహమే....
మితృలందరికీ...