Pages

Saturday, April 23, 2011

మనం పుస్తకాలు ఎందుకు చదవాలంటే...



నీ ఊహా ప్రపంచంలో
చెయితిరగని కంచంలో
ఎందుకోయ్ పెట్టుకున్నావ్ అన్నం కొంచెం..?
పెట్టుకోవోయ్ పెద్ద బంగారు కంచం
ఒంచుకోవోయ్ పాయసం నిండుగా కంచం...!
(ఇది మా నాన్నగారు శ్రీ పిడపర్తి సుబ్బయ్యశాస్త్రిగారు ఊహాప్రపంచం గురించి వ్రాసుకున్న కవితలో చిన్న భాగం. మన ఊహ మన చిత్తం వచ్చినట్టు ఎంతగా ఎల్లలు దాటి ఊహించుకోవచ్చోనని ఆయన చెప్పిన విషయాన్ని తెలియచెప్పడానికి ఇది ఇక్కడ పెట్టాను.)

మనం పుస్తకాలు ఎందుకు చదవాలంటే...
మనిషికి ఊహలో ఊహించుకున్నంత ఆనందం నిజజీవితంలో కనిపించదు.
నిజం కంటే ఊహ అందంగా వుంటుంది కనకే మనిషి తను చెయ్యలేని పనినీ, తన కళ్ళకు కనిపించలేని అందాల్నీ ఊహలో వెతుక్కుంటాడు.
ఒక సినిమా చూస్తున్నప్పుడు కానీ, టీవీ చూస్తున్నప్పుడు కానీ కథలోని పాత్రలు కళ్ళముందు కనపడతాయి. అవి నిర్మాతా, దర్శకుల దృష్టిలో సృష్టించుకున్న పాత్రలు, సంఘటనలు. వాటిని వారి దృష్టితోనే మనమూ చూస్తున్నాం. ఒక్కరి అభిరుచి అవి చూస్తున్నవారందరిమీదా రుద్దబడుతోంది.
అదే మనం ఒక పుస్తకం చదువుకుంటుంటే జరిగే పరిస్థితి వేరు. పుస్తకంలో కవిగాని, రచయితగాని రాసినదానిని చదువుతున్నప్పుడు మనం దానిని మన అభిరుచికి అనుగుణంగా ఆ సుందరదృశ్యవర్ణనను కానీ, ఆ పాత్ర మనసులోని భావాలనుగానీ, ఆ పాత్ర ప్రవర్తించిన తీరునిగానీ, ఆ పాత్రయొక్క అందం, ఆహార్యంగానీ ఊహించుకుంటాం. అది మన మనసుకి చాలా ఆనందం కలగజేస్తుంది. అందుకే పుస్తకపఠనంలో అంత ఆనందం వుంది.
ఒక మంచి పుస్తకం చదువుతున్నప్పుడు మనం అందులో లీనమైపోతాం. ఆ పుస్తకంలోని కథతో పాటుగా ప్రయాణం చేస్తాం. కథ సుఖాంతమైతే ఆనందిస్తాం. దుఃఖాంతమైతే బాధపడతాం. మన మనసుల్ని ఇంతగా ప్రభావితం చేస్తున్న పుస్తకపఠనాన్ని మనకు సాధ్యమైనంతవరకు ప్రోత్సహిద్దాం. మన పిల్లలకి పుస్తకాలు చదవడం అలవాటు చేద్దాం. ఎంతో గొప్ప కవులని, రచయితలని వాళ్ళకి పరిచయం చేద్దాం. పుస్తకపఠనంలోని ఆనందాన్ని వాళ్ళకీ రుచి చూపిద్దాం.
ఏప్రిల్ 23 జాతీయ పుస్తకదినం సందర్భంగా...
(చిత్రం...గూగులమ్మ సౌజన్యంతో...)

Friday, April 15, 2011

చిత్రమే కదా మరి...!





టెక్నాలజీ పెరిగే కొద్దీ
మనుషుల మధ్య దూరం తరుగుతోందంటే
చిత్రమే కదా మరి....!

నా ఇంట్లో టివి ముందు కూర్చుని
ఇరాన్ ఇరాక్ యుధ్ధం నుండి
అమెరికా అధ్యక్ష్యుని ఎన్నికల వరకూ
ప్రత్యక్ష్యప్రసారం చూస్తున్నా...
కాని...
పక్కింట్లో దొంగలుపడి మొత్తం వూడ్చుకెళ్ళినా
మర్నాడు ఉదయం పేపర్ చూసేవరకూ తెలీనేలేదంటే
చిత్రమే కదా మరి...!

ఇంటర్నెట్ లోకి దూసుకెళ్ళి
అభిప్రాయాలూ అభిరుచులూ కలిసాయనీ
విద్యా ఉద్యోగం కలిసొచ్చాయనీ
పిల్లని సెలెక్ట్ చేసుకుని, పెళ్ళికి సిధ్ధపడితే
తీరా వివరాల్లో...
ఆమె మా మామకూతురేనని బయటపడితే
చిత్రమే కదా మరి...!

పండగ పిండివంటలకోసం
వంటల వెబ్ సైట్ కి వెళ్ళి
అపురూపమైనది తయారుచేద్దామని
రేర్ డ్రైడ్ మసాలా బ్రోకెన్ ఫ్రైడ్ రైస్ చెస్తే
ఆకారం తేలేసరికి అది మా అమ్మమ్మ చేసే ఉప్పుపిండై కూర్చుంటే
చిత్రమే కదా మరి...!

టెక్నాలజీ పెరిగే కొద్దీ
మనుషుల మధ్య దూరం తరుగుతోందంటే
చిత్రమే కదా మరి....!
_______________________________________________________________

ఆంధ్రప్రభ వారపత్రిక సౌజన్యంతో......
(చిత్రం..గూగులమ్మ సౌజన్యంతో..)

Wednesday, April 13, 2011

శ్రీరామనవమినాడు మా ఇంట్లో కొలువైన సీతారామచంద్రులు...



ఉగాదిరోజు మొదలుపెట్టి శ్రీరామనవమి వరకు సుందరకాండ చదివి, శ్రీరామనవమినాడు రామపట్టాభిషేకం చదువుతుంటాను.
అలాగే ఆ రాముని దయవలన ఈ సంవత్సరం కూడా చదవగలిగాను. ఆ రామచంద్రమూర్తి అందరికీ ఆనందాన్నివ్వాలని కోరుకుంటున్నాను.