మాలికపత్రిక సంపాదకురాలు జ్యోతివలబోజు స్వదస్తూరీతో అందరినీ ఆవకాయ గురించి వ్రాయమన్నారు. అసలే మే నెల. కొత్తఊరగాయలకాలం. ఆవకాయ పెట్టడం వచ్చినవాళ్ళూ, రానివాళ్ళూ, దానిని ఆస్వాదించేవాళ్ళూ, దాని పేరు చెప్పుకుని మురిసిపొయేవాళ్ళూ, కొత్తావకాయ అందని దూరదేశాల్లో వున్నవాళ్ళూ అందరూ స్పందించి ఆవకాయ గురించి వారి వారి అభిప్రాయాలు వెల్లడించారు. అందులొ నేనూ వున్నాను. నా దస్తూరీతో వచ్చిన ఈ కవిత మాలిక మే నెల పత్రికలో వచ్చింది. ఆ దస్తూరీ యెవరికైనా అర్ధమవకపోతే విడిగా చదువుకుంటారని నా బ్లాగ్ లో టైప్ చేసి కూడా పెడుతున్నాను. అందరూ ఆస్వాదిస్తారు కదూ..
ఆవకాయదె
యెపుడు అగ్రపూజ…
రంగు చూడంగనే లాలాజలాలూరు
రుచులు చెప్పగమరి బ్రహ్మ దిగునె
యేటుచూసి యెటువిన్న దాని నామమె గదా
ఆవకాయదె యెపుడు అగ్రపూజ//
నూపప్పునూనెతొ చద్దన్నం కలిపినా
కమ్మనీ నెయ్యేసి వేడన్నం కలిపినా
జఠరాగ్నిలో వేడి అంతెత్తు లేవదే
ఆవకాయదె యెపుడు అగ్రపూజ//
మెంతి, మాగాయలు తమ్ముళ్ళుకాగా
గోంగూర, చింతలు పక్కోళ్ళు కాదే
ఉసిరికాయెప్పుడూ యెక్కడో వుండదే
ఆవకాయదె యెపుడు అగ్రపూజ//
శాకపాకంబులు యెన్నెన్నివున్నా
పిండివంటలు పది తెచ్చి వడ్డించినా
ఆవకాయయె లేని అదియేమి విందయా
ఆవకాయదె యెపుడు అగ్రపూజ//
అతిథులొచ్చినపుడు అందుబాటుగనుండు
కూరలేనపుడు అదియె చేదోడు యగును
పప్పులో కలిపితే చెప్పలేరా రుచిని
ఆవకాయదె యెపుడు అగ్రపూజ//
ఐపాడ్లు, ఐఫోన్ల దిగుమతులకన్న
ఇటునుంచి పంపించు ఈకాయ మిన్న
పెరిగె పచ్చళ్ల ప్యాకింగు ప్రతివీధిలోన
ఆవకాయదె యెపుడు అగ్రపూజ//
--------------------------------------------------------------------------------
7 వ్యాఖ్యలు:
నిజమే :)
చాలా బాగుంది లక్ష్మి గారూ
చాలా బాగుంది లక్ష్మి గారూ
కదా మాలాగారూ..
ధన్యవాదాలు భువనచంద్రగారూ..
చాలా చాలా బావుంది.
Thank you Bharathi..
Post a Comment